കോഴിക്കോട്:നവജാത ശിശുക്കൾക്ക് ആധാർ എൻറോൾമെന്റ് നടത്തുന്ന പദ്ധതി ജില്ലയിൽ തുടക്കമായി. അക്ഷയ 15ാം വാർഷികാഘോഷത്തോടനുബന്ധിച്ച് നവജാത ശിശുക്കൾക്കായി നടത്തിയ എൻറോൾമെന്റ് ക്യാംപിന്റെ ജില്ലാതല ഉദ്‌ഘാടനം കോഴിക്കോട് ബീച്ച് ആശുപത്രിയിൽ എ. പ്രദീപ് കുമാർ എംഎൽഎ നിർവഹിച്ചു.
ഗവ. ബീച്ച് ആശുപത്രിയിലെ 13 നവജാത ശിശുക്കളുടെ ആധാർ എൻറോൾമെന്റ് നടത്തി. കുട്ടികളുടെ ജനനസർട്ടിഫിക്കറ്റും, രക്ഷിതാവിന്റെ ആധാർ കാർഡും ഉപയോഗിച്ചാണ് ആധാർ എൻറോൾമെന്റ് നടത്തുന്നത്.
അക്ഷയ കോ–ഓർഡിനേറ്റർ പി.എസ്. അഷിത, ഗവ.ജനറൽ ആശുപത്രി സൂപ്രണ്ട് ഡോ. ഉമ്മർ ഫറൂഖ്, എഡിഎം ടി. ജനിൽകുമാർ, കൗൺസിലർമാരായ എ.ഡി. തോമസ് മാത്യു, പി. കിഷൻചന്ദ്, ഡോ.പ്രസീത, ജിതിൻ രാജ് എന്നിവർ പ്രസംഗിച്ചു.
