കോഴിക്കോട്: സ്ത്രീയാത്രക്കാര്‍ ഏറ്റവും കൂടുതല്‍ ആശ്രയിക്കുന്ന കോഴിക്കോട് മൊഫ്യൂസില്‍ ബസ്‌സ്റ്റാന്‍ഡില്‍ മുലയൂട്ടല്‍ കേന്ദ്രം ഉടന്‍ ആരംഭിക്കുമെന്ന് മന്ത്രി എ.കെ. ശശീന്ദ്രന്‍. മൊഫ്യൂസില്‍ സ്റ്റാന്‍ഡില്‍ ദേശീയ നഗര ആരോഗ്യ ദൗത്യത്തിന് കീഴില്‍ ആരംഭിച്ച "വഴികാട്ടി' പ്രഥമ ശുശ്രൂഷ കേന്ദ്രത്തിന് സമീപമാണ് മുലയൂട്ടല്‍ കേന്ദ്രം ആരംഭിക്കുക. ഇവിടേക്ക് ആവശ്യമായ സൗകര്യങ്ങള്‍ വരും ദിവസങ്ങളില്‍ ഏര്‍പ്പെടുത്തും. കോഴിക്കോട് കെഎസ്‌ആര്‍ടിസി ടെര്‍മിനലിലെ വനിതകളുടെ വിശ്രമ മുറിയില്‍ ദേശീയ ആരോഗ്യദൗത്യത്തിന്‍റെ ഭാഗമായി ആരംഭിച്ച മുലയൂട്ടല്‍ കേന്ദ്രത്തിന്‍റെ ഉദ്ഘാടനം നിര്‍വഹിക്കുകയായിരുന്നു അദ്ദേഹം.
ഇന്ത്യന്‍ അക്കാഡമി ഓഫ് പീഡിയാട്രിക്‌സും നിയൊനേറ്റല്‍ ഫോറവും സംയുക്തമായാണ് ജില്ലയില്‍ കെഎസ്‌ആര്‍ടിസി, മൊഫ്യൂസല്‍ ബസ്‌സ്റ്റാന്‍ഡ്, റെയില്‍വേ സറ്റേഷന്‍ എന്നിവിടങ്ങളില്‍ മുലയൂട്ടല്‍ കേന്ദ്രം ആരംഭിക്കുന്നത്. റെയില്‍വേ സ്‌റ്റേഷനില്‍ നാലാം പ്ലാറ്റ്‌ഫോമിലെ വനിതകള്‍ക്കായുള്ള വിശ്രമകേന്ദ്രത്തിലാണ് മുലയൂട്ടല്‍ കേന്ദ്രം ആരംഭിക്കുന്നത്. കെഎസ്‌ആര്‍ടിസി ടെര്‍മിനലിലെ വനിതാവിശ്രമമുറിയിലാണ് മുലയൂട്ടല്‍ കേന്ദ്രം ആരംഭിച്ചത്. കേന്ദ്രത്തിന് കസേരകളും ഫാനും ജില്ലാ സഹകരണ ബാങ്കാണ് അനുവദിച്ചത്.
മാതൃശിശു സംരക്ഷണ പരിപാടിയുടെ ഭാഗമായി അമ്മമാരുടെ ഇടയില്‍ മുലയൂട്ടലിന്‍റെ പ്രാധാന്യം വര്‍ധിപ്പിക്കുന്നതിന് വിവിധ പരിപാടികളാണ് ആരോഗ്യവകുപ്പും ദേശീയ ആരോഗ്യദൗത്യവും നടപ്പാക്കുന്നത്. ബസ്‌സ്റ്റാന്‍ഡുകളിലും റെയില്‍വേ സ്‌റ്റേഷനുകളിലും സ്ത്രീകള്‍ക്ക് സുരക്ഷിതമായി കാത്തിരിക്കാനും മുലയൂട്ടാനും കഴിയുന്നില്ലെന്ന പരാതിയുടെ അടിസ്ഥാനത്തില്‍ പൊതുഇടങ്ങളില്‍ മുലയൂട്ടാനും വിശ്രമിക്കാനുമുള്ള സൗകര്യങ്ങള്‍ ഒരുക്കുന്നുണ്ടെന്നും മന്ത്രി പറഞ്ഞു.
അഡീഷണല്‍ ഡിഎംഒ ആശാദേവി, അസി. ട്രാന്‍സ്‌പോര്‍ട്ട് ഓഫീസര്‍ ഷാജു ലോറന്‍സ്, ജില്ലാ സഹകരണ ബാങ്ക് മാനേജര്‍ കെ.പി. അജയകുമാര്‍, ദേശീയ ആരോഗ്യദൗത്യം ഡിപിഎം ഡോ. എ. നവീന്‍, ഡോ. കൃഷ്ണകുമാര്‍, കെടിഡിഎഫ്‌സി മാനേജര്‍ ഷെറിത്ത്, സി.ദിവ്യ, ഡോ. സി.വി. കൃഷ്ണന്‍ കുട്ടി എന്നിവര്‍ പങ്കെടുത്തു
0 Comments